فۆتۆ وەك هەر هونەرێكی بینراویی دیكە،لە ریێ هەستەوەرەكانمانەوە خۆشی دەبەخشی بۆ ناخی مرۆڤ ، زۆر جار مرۆڤ حەز دەكات یاخود پێویستی بە هێمنییەك دەبێ، ئەم دۆخە ئاساییە ، هەندێ جار پاڵماندەنێ بۆ گوێ گرتن لە پارچەیە میوزیكی هێدی ، بەڵام جاری وا هەیە ئارەزوومان تێر نەكات، بۆیە گوێ لە خوێندنەوەی شیعر دەگرێ یاخود خۆی هەڵدەستێ بە خویندنەوەی ، بەڵام ئەمەش دیسان زۆرجار ئارەزووەكانمان پڕ ناكاتەوە بۆیە دەگەڕێین بە دوای تابلۆیەكی شێوەكاری یاخود فۆتۆگرافیدا، بۆ ئەوەی ئەو پشووەی بە دوایدا دەگەڕێین بیدۆزینەوە .
چاوی هونەرمەندی ئەم وێنە سروشتیانە، زۆر بە ناسكی خەیاڵی خۆی بۆ چاوت دەگوێزێتەوە، ئەمەش دۆخێك لە بەردەوامیی هەستی بینەر بۆ دیمەنێك لەگەڵ خودی هونەرمەند دروست دەكات ، وەك چۆن لەكاتی رۆمان خویندنەوەدا بێ ئەوەی هەست بە زەمەن و دەوروبەر بكەین، هێور هێور دەخزێتە نێو لاپەڕەكانی پاشان دێرەكانی و لەكۆتاییدا خۆمان لە نێو رۆمانەكەدا دەدۆزینەوە، هەمان كاریگەری بەسەرمدا دێت كاتێك تەماشای تابلۆیەكی شێوەكاری یاخود فۆتۆگرافی دەكەم . جوانیەكانی سروشتی كوردستان بێ هاوتان، گواستنەوەی ئەو جوانیەش سانا نییە ، بەڵكو پێویستی بە چاوێكی دوربین وخەیاڵپڵاو هەیە، بۆ ئەوەی كاریگەری راستەوخۆی هەبێت لە وروژاندنی خەیاڵدان و هەستی بینەر، ئەم دیمەنە لەراستیدا خۆشییەك دەبەخشێ بەچاوی مرۆڤ و لە گرتەی زەمەنێكی كورتەوە دەدبات بۆ قووڵایی زەمەنێكی دیكە، رەنگە بەشێك بێت لە یادەكانی رابردوو، یاخود دەبێتە بەشێك لە یادەوەرییە داهاتوییەكان .